一拖二四圍遊 終極挑戰 長洲愛暉營 兩日一夜宿營 飛甩爸爸
爸爸因爲工作關係，好少假期，唔想雷囡成日係屋企，所以我都成日一拖二帶佢地四圍去,雖然好辛苦，都值得嘅!
今次挑戰兩日一夜宿營，跟同學仔媽媽一齊，多得各位媽媽們幫手訂房訂餐，安排活動。仲幫手搬行李。個個都係「超人媽媽」真係好多謝佢地。
講返呢個明愛愛暉營，價錢當然唔夠康民署嘅平靚正啦，但勝在比康民嘅易訂好多。不過真係好殘舊...亦都冇乜設施可言。個人認為比較適合中學生，或學校體驗活動啦！好像雷小囡咁細嘅幼童真係唔多適合喇。因為地方真係唔算乾淨，而且太多蚊，我做足準備，搽晒防蚊膏帶埋蚊帶蚊扣都不能幸免...小囡連手指都被咬到腫晒，變左芝士腸😅😅 心痛死我！
首先講下位置，從碼頭去有2條路可以揀。問左2次長洲居民都叫我地行山路....我地拖住小朋友，又一袋二袋仲有行李箱。要經一條好長上樓梯，再上落山路，真係辛苦到暈。途中雷小囡仲留低野係百佳，我一個人返去攞完，自己去搵路。點知又俾2個當地人點左條錯嘅路...最終我一個人由山腳行上山頂再落返山，回原地😭 
所以、有行李嘅朋友，最好行沿海路線，經沙灘邊，過左停機坪，再經另一個小沙灘上一段小斜路就到。舒服好多👍🏻👍🏻
營地其實都幾唔方便。因為分2楝建築物bbq要上山，食完要摸黑落山。除山路外，中間有條類似引水道嘅樓梯可以上落。但真係好危險。入夜千萬唔好行
泳池係分段入場，訂房只包一次入場。再入要收費。而且我去當天星期六是不開放。只有星期日先開。但剛好發生小插曲。我地入埸時剛見到池邊有小朋友係泳池濾水坑嘔吐....佢身邊嘅大人真係超級有問題！有2個喺池內，2個喺池邊，見小朋友唔舒服話想嘔，唔即時抱走佢，淨係識叫佢唔好喺呢度嘔...結果嘔完先走！事後我即時叫池內嘅朋友上水。向救生員反映佢地話見唔到所以只用水喉沖沖就算。
我訂果間4人房。房間設備簡陋，沖涼嘅地方好窄，企唔到2個人。好彩雷小囡可以用花灑企係度沖涼，我要喺企缸外幫佢淋水...都真係幾唔方便😅 而朋友嘅5人房就大好多，浴室仲有浴缸（當然唔會用啦😅）但起碼都寬敞啲。幫小朋友沖涼都易啲吖嘛！不過價錢當然貴啲啦。
我地4人房，2大2小加一個bb，房價加份燒烤包，每個家庭$400左右。朋友嘅5人房就2大2小，加燒烤包每家庭$600左右。其實加埋都唔算便。補多少少租渡假屋好過。舒服好多😅
所以總括黎講，個人認為帶bb 去太辛苦。如果小學嘅小朋友俾佢地捱下苦，經歷下都可以嘅🤣
呢個旅程雖然真係好辛苦，但可以一班同學仔一齊玩，一齊經歷，都好開心。第一次可以同同學仔一齊瞓，一齊喺間房玩潛烏龜，傾計傾到好夜😆真係好難得。希望呢個旅程俾到小朋友同媽媽們一個難忘而美好嘅回憶啦！
最後真係好多謝媽媽們，幫我一齊照顧雷小囡，又幫我拎野。真係幫左我好多。亦都多謝呢班小朋友，個個都幫手拎野，照顧自己，感覺佢地好似一夜之間大左好多咁☺️☺️好感動💗💗
想知多啲我地嘅 #生活小貼士、#簡單食譜、#育兒分享、#吃喝玩樂、#美容，#親子遊、#親子烹飪 ，快啲Like我地啦😘
Facebook page : 雷囡媽媽 https://www.facebook.com/pg/luiluimamak
Facebook:https://m.facebook.com/luiluimama
YouTube: Luiluimamak https://youtube.com/results?q=luiluimamak
Instagram: https://www.instagram.com/luiluimama/
#產品試用 #邀稿 #blogger #出席活動 #babyblog #mumblogger #bkol #hkkol #cutebaby #beauty #lifestyle #f4f
