今日有幸免費參加左個烘焙班。課堂係因為cook1cook 嘅活動《地獄廚神》贏返嚟嘅第二名獎品，講明係地獄廚神，當然就係一啲外貌欠佳嘅製成品啦！當然遊戲性質只係得啖笑，所以我哋攞到呢個獎都非常開心！
仲有獎品實在太令人興奮喇，「烘焙課程一堂」，而呢個獎係用雷大囡嘅親子棉花糖參賽嘅，所以贏咗嘅獎品當然就係歸佢啦！所以今日制作過程有八成都係由佢操刀嘅！我就係從旁協助，點解係八成呢？因為佢聽日要壁球考章，我怕佢搓麵粉搓到手軟，所以我有幫佢搓小小咁啦！其他大致上好多程序都係由佢做嘅。今日真係好開心！
其實參加過好多親子活動，但「親子」係唔係真係親子呢？
對我黎講親子活動目的係為左拉近父母子女之間距離，令大家互相了解，增進感情，增加美好回憶。親子活動，在於互相合作一齊完成事情，例如一齊做小手作，一齊整野食。但有時候自己會忘記左親子嘅原意。對小朋友有好多要求，要佢整得靚啲，呢度唔啱，果度錯左...
最後唔單止感情冇增進到，反而令關係更加惡劣。
喺我參加親子活動嘅期間，遇過好多事情，令到我有好深嘅啟發。見過一啲家長因為個小朋友件作品畫得唔靚，而責罵佢哋。一個應該好溫馨嘅親子活動，突然間變咗有一對虎爸虎媽鬧緊個喊得好淒涼嘅小朋友...亦都見過好多父母心急，嫌小朋友手腳慢，最終件成品九成都係家長做，小朋友只係「放埋一邊」裝飾....而最常見嘅當然就係，為咗令件成品靚靚仔仔，直情唔俾小朋友插手。最後父母就攞住件靚靚制成品，迫個嬲爆爆嘅小朋友影相....而最惡劣嘅情況就係一個親子活動，為左「討論」點做，父母同小朋友互相指責嗌交收場，個仔用粗口鬧阿媽，阿媽仲差啲出手打個仔...咁樣仲叫做親子活動？
我明白，要學放手真係一啲都唔容易，特別我哋宜家呢個世代，有時真係好想個成品靚靚仔仔，影張相上網影張相上網呃Like。又或者每個親子活動嘅時間都有限，希望可以同小朋友
趕上進度，令父母變得心急，心情煩躁，呢點完全可以理解嘅。因為其實我自己都經歷過，甚至乎而家間中都會咁犯同樣嘅錯。但係每一次我都會提醒自己，點為之親子活動呢？
例如以前同阿囡一齊整野食，開頭成日驚佢破壞我成品，個個步驟都唔俾佢插手，到最後發現差唔多成個都係自己做。之後次次問佢都話唔想整，冇興趣。後來我發現，原來因爲我自己每次都對佢多多意見，令佢唔想整。
之後我開始學習放手。剛開始，見到佢做嘢做錯晒，真係好想插手㗎 ！但每一次我都提醒自己，要放鬆，成品唔一定要靚，最重要係大家真係可以享受個過程。
而家，我甚至覺得，一件奇形怪狀嘅成品,先值得我影相留為紀錄。因為唔完美，先能夠成為我囡成長嘅證明💗
最後，希望能夠係呢度時刻提醒自己。結果係點冇所謂。能夠同小朋友渡過開心嘅時光，先係最重要嘅💗💗
想知多啲我地嘅 #生活小貼士、#簡單食譜、#育兒分享、#吃喝玩樂、#美容，#親子遊、#親子烹飪 ，快啲Like我地啦😘
Facebook page : 雷囡媽媽 https://www.facebook.com/pg/luiluimamak
Facebook:https://m.facebook.com/luiluimama
YouTube: Luiluimamak https://youtube.com/results?q=luiluimamak
Instagram: https://www.instagram.com/luiluimama/
#產品試用 #邀稿 #blogger #出席活動 #babyblog #mumblogger #bkol #hkkol #cutebaby #beauty #lifestyle #f4f
沒有留言:
發佈留言