2018年10月8日星期一

請唔好質疑小朋友嘅誠信!! 唔識表達自己唔係佢嘅錯! 要幫小朋友建立自信好難,但要破壞佢只需一句說話..請小心你嘅用詞

圖像中可能有1 人、坐下
雷大囡成日問我,做咩佢做乜諗乜我都估到。每次我都答佢:「我地有條隱形嘅臍帶連繫住,所以佢諗乜做乜我都知。由懷孕果刻開始,我地一直有條臍帶連繫着,雖然出世後會剪斷左,但我地只係從有線變左無線接收姐」 🤣細細個果時佢會覺得好神奇,到而家大左開始半信半疑,但呢個係我地嘅小默契。只有相信,佢先解釋到點解佢諗乜我都知😆
實際上呢條無線臍帶存唔存在冇人知。但個個媽媽都好了解自己子女,媽媽從bb一出世就開始要估佢想點,估佢想食奶定想poopoo?點解會喊,點樣止喊...從出世果一刻開始睇佢睇佢尾頭眼額。個個都係福爾摩斯嚟㗎嘛,點會唔知你想點吖!
所以我個囡係咩人咩性格我絕對了解。我知我個囡係比較內向,比較唔識表達自己。小學四年級算大定算細冇標準,只可以對事而論。有人話咁大個唔識表達自己係唔得。雖然我都會鼓勵佢學習嘗試表達。但我唔會迫、亦知道冇得迫,唔需要迫。人冇完美嘅,我而家咁多野講咁嘈,其實我細個性格仲內向過雷大囡。
人會大,性格會轉變。我會俾時間佢慢慢摸索。只要佢心係善良,外向內向,好靜好動又如何?唔通每個人都要教到一式一樣用個模印出嚟會比較好咩?
但當然我地大人知道,唔敢表達自己好蝕底。但你估個小朋友自己唔想表達嗎?佢只係唔識,唔敢。同大人唔同,大人表達自己冇負擔,可以為自己嘅說話負責。唔洗驚呢樣驚果樣。 但小朋友唔同,佢地比我地擔心嘅更多,唔敢大聲講野,怕老師話俾媽媽聽,唔知媽媽會唔會鬧。怕媽媽話俾老師聽,唔知老師會唔會罰。太多野怕,所以好多時俾人問多2句就唔知點答。唔係因為佢想講大話,可能只係怕答錯。
作為成年人,可唔可以俾啲空間小朋友呢? 唔好因爲佢說話吞吞吐吐就懷疑佢做壞事或者想講大話!大人被質疑自己嘅誠信都會好難過,何況小朋友嘅弱小心靈?一句懷疑嘅說話可以傷得小朋友好深...特別係一啲平時已經唔識表達自己嘅小朋友。你一句質疑已經可以打破一直以來對你嘅信任。
所以,請大家未了解事情真相之前,請先選揀相信小朋友,幫助佢地解決問題。而唔好用質疑說話懷疑嘅態度去「了解」真相。咁只會嚇壞小朋友。更傷害佢弱小嘅心靈。
好掛住我個囡,仲有一個鐘先放學。好想快啲大大力攬住佢,話俾佢知媽咪相信佢,愛佢。
🌟阿囡,你唔洗驚。喺適當嘅時候,你呢個自由放養型媽媽,都可以變身做怪獸媽媽,做你嘅直升機守護神。只要你知道媽咪永遠都係你旁邊支持你
唔好意思,有感而發,冇乜重點。
#有口難言
#小事一樁
雖然可能只係我諗多左,可能佢根本單純到聽唔出人地對佢質疑嘅說話..
(希望係咁啦,希望佢純真嘅心仲未被污染)
媽咪愛你😘😘😘

沒有留言:

發佈留言

【豐胸產品推薦】如何豐胸效果最好? 唔好錯過之Envus豐胸體驗

【 豐胸產品推薦 】 如何豐胸 效果最 好 ?   唔 好 錯過之 Envus 豐胸體驗 早前去左  Envus  做左一次即時見效嘅豐胸療程。 起初我都充滿懷疑,非藥物、非注射、非手術! 點可能一次有效果?  但 我以前 搵左好...